Швейцариялыктар өлкөнүн калкын 10 миллионго чейин чектөө сунушун четке какты

Швейцариянын жарандары 14-июндагы референдумда өлкөнүн туруктуу калкынын санын 10 миллионго чейин чектөө демилгесине каршы добуш беришти. Добуш берүүгө катышкандардын 55%ы бул сунушка каршы экенин Bloomberg билдирди Бул демилгени өлкөдөгү эң ири оңчул консервативдүү Швейцариянын Элдик партиясы көтөргөн. Ал 2050-жылга чейин калктын санын 10 миллиондон ашпоого жол бербөөнү сунуштады. Эгер бул чектен эки жыл ичинде ашып кетсе, бийликтер Евробиримдик менен эркин жүрүү келишимин жокко чыгарышы керек Демилгени колдогондор калктын көбөйүшү инфраструктурага жана турак жай рыногуна көбүрөөк оорчулук келтирип жатканын айтышты. Оппоненттер чектөөлөр экономикага зыян келтирип, Швейцариянын Евробиримдик менен мамилесин татаалдаштырышы мүмкүн деп эскертишти Өлкөнүн өкмөтү менен парламенти бул сунушка каршы чыкты, бирок тиешелүү петицияга 100 миңден ашуун жаран кол койгондон кийин референдум жарыяланды 2025-жылдын аягында Швейцариянын калкы тогуз миллиондон бир аз ашкан. Федералдык статистикалык башкармалыктын болжолуна ылайык, 2055-жылга карата ал негизинен миграциянын эсебинен 10,5 миллионго чейин өсүшү мүмкүн Azattyk Asia © 2026 RFE/RL, Inc. | Бардык укуктар корголгон