ҚазҰУ-да академик Хабиболла Оспанов атындағы зал мен аудитория ашылды

Химия және химиялық технология факультетінің төртінші қабатында орналасқан жаңа оқу орындары Түлектер күніне орай және университетті бітірген меценаттардың демеушілігінің арқасында толығымен жаңартылды Салтанатты шара академик Хабиболла Оспанов атындағы залдың ашылуымен басталып, оның қызыл лентасын басқарма төрағасы – ҚазҰУ ректоры Жансейіт Түймебаев, Парламент Сенатының депутаты Алтынбек Нұхұлы және академик Мұрат Жұрынов қиды. Шара барысында ақын Аспанбек Шұғатаевтың орындауындағы «Жыр шашу» жырымен сүйемелденген ғалым бюстінің салтанатты ашылу рәсімі өтті Жиында сөз алған университет ректоры Жансейіт Түймебаев профессор Хабиболла Оспановтың ғылыми мұрасы халықаралық деңгейде жоғары бағаланғанын, ғалымның өзі отандық ғылым мен жоғары білім саласының дамуына өлшеусіз үлес қосқанын атап өтті. Университет басшысы өз сөзінде академиктің минералды еріту кинетикасы мен сутегі энергиясы саласындағы зерттеулері бүгінгі күні де өзекті болып отырғанын, ол негізін қалаған ғылыми мектеп көптеген жас ғалымдардың дамуына жол ашқанын атап өтті. Жансейіт Қансейітұлы Хабиболла Құсайынұлының өнегелі өмір жолы мен ғылыми қызметі жастарға еңбексүйгіштіктің, адалдық пен отансүйгіштіктің жарқын үлгісі болып табылатынын айта келе, аталған кеңістіктер жай ғана оқу кабинеттері емес, ғылымға құрмет, ұстазға деген құрмет пен ғылым сабақтастығының нышаны екенін атап өтті Шара аясында университет басшысы жоғары білім мен ғылымды дамытуға қосқан үлесі үшін Парламент Сенатының депутаты Алтынбек Нұхұлын әл-Фараби атындағы алтын медальмен марапаттады Салтанатты шара заманауи үлгіде жабдықталған No418 кабинеттің ашылуымен аяқталды. Лента қию рәсіміне академиктің балалары мен жақын туыстары қатысты. Профессор шәкірттері мен жақындарының қолдауымен жүзеге асырылған бұл игі бастама Қазақстанның болашақ химиктері үшін ғалымның мұрасын сақтауға бағытталған