SOCAR Türkiyə kerosin ixracını dayandırıb və bütün həcmi daxili bazara yönəldib

“SOCAR Turkiye Enerji” şirkətinin prezidenti Elçin İbadov bildirib ki, son aylar qlobal enerji böhranı və Hörmüz boğazı ətrafında yaranan gərginlik fonunda şirkət STAR neft emalı zavodunda istehsal olunan aviasiya yanacağını tamamilə Türkiyənin daxili bazarına yönəldir. SOCAR Turkiye Enerji Azərbaycan Respublikası Dövlət Neft Şirkətinin (SOCAR) Türkiyədəki törəmə şirkətidir "Bir sıra mühəndis həlləri və əlavə investisiyalar sayəsində biz STAR neft emalı zavodumuzun gücünü ildə ilk 10 milyon tondan 13 milyon tona çatdıra bildik. Hazırda müəssisə tam gücü ilə işləməyə davam edir. Biz məhsullarımızı, ilk növbədə, aviasiya yanacağını əhəmiyyətli həcmdə, son aylarda isə tam həcmdə Türkiyənin daxili bazarına göndəririk", - İbadov CNN Türk-ə müsahibəsində bildirib Onun sözlərinə görə, daha sərfəli ixrac təkliflərinin olmasına baxmayaraq, Türkiyəyə tədarükün etibarlılığının təmin edilməsi şirkət üçün prioritet məsələdir “Biz aviasiya, dizel yanacağı və digər neft məhsulları seqmentlərində daxili bazarı lazımi resurslarla təmin etmək üçün hər cür güzəştə getməyə hazırıq”, - deyə şirkət rəhbəri vurğulayıb İbadov qeyd edib ki, STAR neft emalı zavodu neft-kimya sektorunda da yüksək gücdən istifadəni təmin edir. "Paralel olaraq biz neft-kimya məhsulları üçün xammal təmin edirik, çünki STAR zavodunun tam gücü ilə işləməsi həm də müvafiq məhsulların böyük həcmdə buraxılmasını nəzərdə tutur. Biz istehsalatda heç bir fasilə olmadan bu sahədə işimizi davam etdiririk", - o əlavə edib Bununla belə, SOCAR Türkiyə prezidenti etiraf edib ki, xammalın, xüsusən də neftin alınmasında müəyyən çətinliklər var ki, bu da ilk növbədə qiymət amili ilə bağlıdır "Geosiyasi vəziyyətlə əlaqədar neftin qiymətinin artması səbəbindən aviasiya və dizel yanacağı xeyli bahalaşır. Bu tendensiya davam edərsə, neft məhsulları və neft-kimya məhsullarını öz istehsalı üçün xammal kimi istifadə edən şirkətlər müəyyən müddətdən sonra onları almaqda çətinliklə üzləşə bilər", - İbadov izah edib Eyni zamanda o bildirib ki, şirkət yaxın gələcəkdə Türkiyəyə neft məhsullarının tədarükündə ciddi fasilələr gözləmir. "Bazar hesabatları və proqnozlar göstərir ki, yaxın gələcəkdə ciddi problem gözlənilmir. İstehsalçılar kimi bizim işimiz tam gücü ilə işləmək, məhsulların paylanması zamanı daxili bazara üstünlük vermək və tədarükün təhlükəsizliyini qorumaqdır. Bunun üçün mümkün olan hər şeyi edirik", - deyə şirkət rəhbəri bildirib İbadovun sözlərinə görə, Türkiyənin ən böyük neft-kimya kompleksi olan “Petkim”in özəlləşdirilməsindən sonra SOCAR onun modernləşdirilməsi və imkanlarının genişləndirilməsi üçün əlavə olaraq 1,7 milyard dollara yaxın vəsait ayırıb “Petkim”in özəlləşdirilməsinə bilavasitə ayrılan təqribən 2 milyard dolları nəzərə alsaq, kompleksə sərmayənin ümumi həcmi 3,7 milyard dollar təşkil edib “SOCAR Turkiye Enerji” “Petkim Petrokimya Holding”in nəzarət paketinə (51%) sahibdir. Şirkət həmçinin Türkiyədə STAR neft emalı zavodunu, konteyner terminalını və elektrik stansiyasını tikdi; daxili bazarı qazla təmin edir və ölkənin ən böyük hava limanlarını aviasiya yanacağı ilə təmin edir