Jerald Darmanənin təqdim etdiyi cinayət ədaləti islahatı ilə bağlı qanun layihəsi rədd edilib

Fransanın ədliyyə naziri Jerald Darmanənin təqdim etdiyi cinayət ədaləti islahatı layihəsi Milli Assambleyanın Hüquq Komissiyasında rədd edilib. Bu nəticə hökumətin əsas islahatlarından biri hesab olunan layihənin qəbulunu daha da çətinləşdirir AZƏRTAC xəbər verir ki, komissiyada keçirilən səsvermədə qanun layihəsi 18 səsə qarşı 16 səslə qəbul olunmayıb. Sol partiyalar layihəyə qarşı çıxıb, ifrat sağçı Milli Birlik (RN) isə bitərəf qalıb Layihə iyunun sonunda Milli Assambleyanın plenar iclasında müzakirə olunacaq. Deputatlar sənədi Senatın aprel ayında qəbul etdiyi versiya əsasında nəzərdən keçirəcəklər Hökumət bu islahatı cinayət məhkəmələrində yığılıb qalan minlərlə işin sayını azaltmaq məqsədilə hazırlayıb. Ədliyyə Nazirliyinin məlumatına görə, hazırda təxminən 6 min ağır cinayət işi hökm gözləyir. Hətta bəzi zorlama işlərində ilk qərarın verilməsi altı ilə qədər uzana bilir Ən çox mübahisə doğuran müddəa isə cinayətini etiraf edən şəxslər üçün “təqsiri etiraf etmə” prosedurunun tətbiqidir. Bu mexanizm ittiham olunan şəxsə sadələşdirilmiş məhkəmə prosesi və cəzanın üçdəbirədək azaldılması imkanı verə bilər. Bunun üçün həm prokurorluğun, həm də zərərçəkənin razılığı tələb olunur Senat layihənin tətbiq dairəsini məhdudlaşdıraraq, onu yalnız bir təqsirləndirilən və bir zərərçəkənin olduğu işlərə şamil edib. Terrorizm, insanlığa qarşı cinayətlər və bəzi ağır cinsi cinayətlər isə bu prosedurdan kənarda saxlanılıb Mart ayında təqdim edilən layihə sol partiyaların, qurbanları müdafiə edən təşkilatların və vəkillər birliklərinin ciddi etirazı ilə qarşılanıb. Tənqidçilər hesab edirlər ki, bu islahat ədalət mühakiməsini həddindən artıq sürətləndirərək, həm qurbanların, həm də müdafiə tərəfinin hüquqlarını zəiflədə bilər 2026 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır