Baku Open 2026-nın bağlanış mərasimi baş tutub - FOTO

Bakıda “Baku Open 2026” beynəlxalq şahmat festivalının bağlanış mərasimi olub İdman.Biz-in məlumatına görə, tədbirdə Azərbaycanın gənclər və idman naziri Fərid Qayıbov, FİDE prezidenti Arkadi Dvorkoviç, Avropa Şahmat İttifaqının rəhbəri Zurab Azmaiparaşvili, Azərbaycan Şahmat Federasiyasının prezidenti Mahir Məmmədov və digər rəsmi şəxslər iştirak ediblər Mahir Məmmədov turnirin qaliblərini təbrik edib və qeyd edib ki, “Baku Open” 2023-cü ildən davamlı olaraq keçirilir. Onun sözlərinə görə, yarış müxtəlif yaş kateqoriyalarından rekord sayda iştirakçını bir araya gətirib Mərasim çərçivəsində festivalın son üç ildə baş verən hadisələri əks etdirən videoçarx nümayiş olunub Fərid Qaibov çıxışında Azərbaycanın zəngin şahmat ənənələrini vurğulayaraq, Azərbaycan Şahmat Federasiyasının bu idman növünün inkişafına verdiyi töhfəni qeyd edib. Nazir onu da bildirdi ki, Azərbaycan Prezidenti İlham Əliyevin idmana verdiyi dəstək beynəlxalq yarışların yüksək səviyyədə keçirilməsinə töhfə verir FİDE prezidenti Arkadi Dvorkoviç bildirib ki, Bakı bundan sonra da şahmatın inkişafı üçün mühüm mərkəzlərdən biri olaraq qalacaq Mərasimin sonunda turnirin qalib və mükafatçılarına medallar, diplomlar və xatirə hədiyyələri təqdim olunub Qeyd edək ki, “Baku Open 2026”da 10 ölkədən 900-dən çox şahmatçı iştirak edib. Turnirin mükafat fondu 50 min ABŞ dolları təşkil edib Yarış iştirakçıları arasında keçmiş dünya çempionu Ruslan Ponomarev, sürətli dünya çempionu Daniil Dubov, azərbaycanlı qrossmeyster Nicat Abasov və 14 yaşadək şahmatçılar arasında Avropa çempionatının qalibi Xaqan Əhməd var idi