Quritilgan o‘rik niqobi ostida 13 kg geroin olib o‘tmoqchi bo‘lgan gumondorlar qo‘lga olindi (video)

Buxoro viloyatidagi chegara bojxona posti orqali Afg‘onistondan Rossiya Federatsiyasiga 13 kilogramm geroinni quritilgan o‘rik niqobi ostida olib o‘tmoqchi bo‘lgan gumonlanuvchilar qo‘lga olindi. Bu haqda Bojxona qo‘mitasi xabar berdi Qo‘mita ma’lumotlariga ko‘ra, joriy yilning 30 may kuni Buxoro viloyatidagi “Olot” chegara bojxona postida Afg‘onistondan Rossiyaga ketayotgan yuk avtomobili ko‘rikdan o‘tkazilgan. Tekshiruv tizimi orqali olingan rentgen tasvirlarini tahlil qilish jarayonida yuk ichida shubhali narsalar aniqlangan Shundan so‘ng, tirkamada tashilayotgan 18,6 tonna qadoqlangan quritilgan o‘riklar xolislar ishtirokida belgilangan tartibda har tomonlama ko‘zdan kechirildi. Tekshiruv davomida 13 dona karton qutidagi mahsulotlar orasiga yashirilgan quritilgan o‘rikga o‘xshash moddalar aniqlandi Sud-tibbiyot ekspertizasi xulosasiga ko‘ra, ushbu moddalar geroin bo‘lib, umumiy og‘irligi salkam 13 kilogrammni tashkil etgan. Ekspertlar musodara qilingan geroinning xalqaro qora bozordagi qiymatini 1,5 million dollargacha baholamoqda Bojxona qo‘mitasining ma’lum qilishicha, joriy yil boshidan buyon O‘zbekistonda bojxona organlari tomonidan 363 holatda 1,7 tonnaga yaqin narkotik moddalarning noqonuniy aylanishining oldi olingan. Bu o‘tgan yilning shu davriga nisbatan 461 kilogrammga ko‘pdir. Holat yuzasidan jinoyat ishi qo‘zg‘atilib, tergov harakatlari olib borilmoqda Avvalroq Toshkent viloyatiga Qozog‘istondan kirib kelgan yuk mashinasida oziq-ovqat mahsulotlari orasidan katta miqdorda dori-darmon topilgani xabar qilingandi