MDH davlatlari hamkorlikni kuchaytirmoqda

Yig‘ilishda O‘zbekiston Respublikasi Bojxona qo‘mitasi raisi Akmal Mavlonov ishtirok etdi Ishtirokchilar bojxona sohasida xalqaro hamkorlikni mustahkamlash, raqamli texnologiyalardan foydalanishni kengaytirish, risklarni boshqarish tizimlarini takomillashtirish, bojxona qonunchiligi buzilishiga qarshi kurashish bo‘yicha sa’y-harakatlar samaradorligini oshirish masalalarini muhokama qildilar Tomonlar bojxona organlari faoliyatida axborot texnologiyalari, zamonaviy dasturiy yechimlar, ilg‘or raqamli ishlanmalardan foydalanish bo‘yicha tajriba almashdi. Bojxona amaliyotiga sunʼiy intellekt texnologiyalarini joriy etish va axborot almashinuvini kengaytirishga alohida eʼtibor qaratildi Shuningdek, kun tartibida inspeksiya tizimlaridan samarali foydalanish, rentgen tasvirlarini tahlil qilishning zamonaviy usullarini qo‘llash, transport vositalarida yashirilgan tovarlarni aniqlash bo‘yicha ilg‘or tajribalarni o‘rganish masalalari ham muhokama qilindi. Tomonlar mutaxassislar tayyorlash, sun’iy intellekt tizimlarini takomillashtirish bo‘yicha yagona ma’lumotlar bazasini yaratish, hamkorlikni kengaytirishga kelishib oldilar Bunday hamkorlik kontrabandaga qarshi kurashishning samarali mexanizmlarini joriy etish, nazorat ostida yetkazib berish tizimini takomillashtirish, mintaqaviy xavfsizlikni mustahkamlashga xizmat qilishi ta’kidlandi Yig‘ilishda Tovarlarni tasniflash bo‘yicha ishchi guruhining yangilangan tarkibi tasdiqlandi. Ishchi guruh rahbari o‘rinbosari etib O‘zbekiston Respublikasi Bojxona qo‘mitasi Markaziy bojxona laboratoriyasi boshlig‘i Ro‘ziboy Ro‘ziyev saylandi. Kengash tomonidan MDHning 35 yilligi munosabati bilan ta’sis etilgan esdalik nishoniga ko‘rsatilgan bojxonachilar ro‘yxati ham tasdiqlandi. Roʻyxatga Oʻzbekiston bojxona xizmatining sakkiz nafar vakili kiritilgan Uchrashuv yakunlari boʻyicha tomonlar kelgusidagi hamkorlikni muhokama qildilar va MDHga aʼzo davlatlarning bojxona organlari oʻrtasida tranzit yuk tashishni takomillashtirish boʻyicha oʻzaro anglashuv memorandumi loyihasini ishlab chiqish tashabbusini eʼlon qildilar Kengashning navbatdagi yig'ilishi joriy yilning ikkinchi yarmida Belarusda o'tkazilishi rejalashtirilgan Sh. Mamaturopova, O‘zA