Жаңы басылмалардын көбү китепкананын фондуларына кире элек

Бардык басылган китептерди китепканаларга жеткирүү электрондук түрдө жүргүзүлүшү керек. Бул тууралуу бүгүн парламенттин Маданият комитети “Китепкана системасынын учурдагы абалы жана өнүгүү келечеги” деген темада өткөн коомдук угууда депутат Элнара Акимова билдирди. Депутат китепкананын фонддорун жаңы басылмалар менен байытуу учурда алдыда турган негизги маселелердин бири экенин белгиледи. "Мыйзам боюнча басмалар мамлекет тарабынан аныкталган китепканаларга өздөрү чыгарган китептердин белгилүү бир нускасын тапшырышы керек. Бирок көп жылдар бою бул норма системалуу түрдө аткарылбай, натыйжада жаңы басылып жаткан басылмалардын олуттуу бөлүгү китепкананын фондусуна түшпөй калган", - деди ал Депутаттын айтымында, китепканаларды жаңы китептер менен камсыздоо менен бирге окурмандардын китепке болгон кызыгуусун арттыруу да маанилүү. Ал мектеп окуучуларынын китепканалар менен байланышын чыңдоо, эрте китеп окуу маданиятын калыптандыруу багытында дагы көп иштерди жүргүзүү керектигин белгиледи. Элнара Акимова ошондой эле өлкөдө басылып чыккан бардык китептерди китепканаларга тапшыруу процессин электрондук система аркылуу көзөмөлгө алууну сунуштады. Анын айтымында, бул көзөмөлдү күчөтөт жана жоопкерчиликти дагы жогорулатат. Эл өкүлү илимий адабият тармагындагы кемчиликтерге да көңүл бурду. Илимий-теориялык котормо китептерге муктаждык чоң экенин, басмаларды бул багытта стимулдаштыруу маанилүү экенин айтты