Тажикстандын бийлиги күн батареяларын орноткон компанияга ири салык жеңилдиктерин берди

Тажикстандын парламенти өлкөнүн бардык аймагындагы ишканаларга жана башка объектилерге күн батареяларын орното турган Ruftob компаниясы менен инвестициялык келишимди ратификациялады. “Азаттык” радиосунун тажик редакциясы билдиргендей, долбоордун алкагында бийлик компанияга олуттуу салык жана бажы жеңилдиктерин берген, бирок анын ээлери тууралуу маалыматты ачыктаган эмес Инвестициялар боюнча комитеттин төрагасынын биринчи орун басары Фаррух Юсуфзода депутаттарга билдиргендей, долбоордун негизги максаты – күн энергиясын пайдаланууну кеңейтүү, кайра жаралуучу булактардан электр энергиясын өндүрүүнү көбөйтүү, энергетика системасындагы электр энергиясынын жетишсиздигин азайтуу жана керектөө күчөгөн маалда электр тармактарына болгон жүктү азайтуу Бийликтин айтымында, Ruftob 2030-жылга чейин жалпы кубаттуулугу 2000 мегаваттка чейин күн батареяларын орнотууну пландоодо. Долбоорго инвестициянын көлөмү 1 миллиард долларга бааланган Келишимдин шарттарына ылайык, компания коммерциялык ишмердүүлүктү баштаган күндөн тартып беш жыл бою корпоративдик киреше салыгын төлөөдөн бошотулган. Бул мөөнөт аяктагандан кийин ал салыктын жарымын гана төлөйт. Мындан тышкары ишканага чет өлкөлүк кызматкерлер үчүн киреше жана социалдык салык боюнча жеңилдиктер каралган Ошондой эле, Ruftob долбоорду ишке ашыруу үчүн зарыл болгон жабдууларды, күн батареяларын, машиналарды, курулуш материалдарын жана башка продукцияларды импорттоодо кошумча нарк салыгын, бажы алымдарын жана башка жыйымдарды төлөөдөн толугу менен бошотулган Компаниянын аты биринчи жолу ушул жылдын май айында инвестициялык комитеттин билдирүүсүндө пайда болгон. Ачык булактарда Ruftob жөнүндө дээрлик эч кандай маалымат жок жана бийлик анын ээлери тууралуу маалыматты ачыкка чыгарбайт 2025-жылдын аягында Тажикстандын өкмөтү күн батареяларынын импортун КНСтен жана рыноктун бардык катышуучулары үчүн бажы төлөмдөрүнөн бошоткон. Бирок жеке компанияга мындай ири өлчөмдөгү жеңилдиктер пакетин берүү буга чейин айтылган эмес Тажикстандын бийлиги күз-кыш айларында өзгөчө курч болгон электр энергиясынын өнөкөт тартыштыгын чечүүнүн жолдорунун бири катары күн энергиясын өнүктүрүүнү карашууда. Быйыл Жайхун жана Ашт аймактарында жалпы кубаттуулугу 500 мегаватт болгон эки күн электр станциясын куруу пландалууда Эл аралык каржы уюмдары Тажикстандагы айрым компанияларга жеке жеңилдиктерди берүү практикасын бир нече жолу сындап, мындай чечимдердин ачык-айкын эместигин белгилешкен. Эл аралык валюта кору менен Дүйнөлүк банк өз баяндамаларында мындай жеңилдиктер атаандаштык үчүн бирдей эмес шарттарды түзүп, бюджеттин киреше бөлүгүн жоготууга алып келерин белгилешти. Тажик бийликтери бул айыптоолорду четке кагып, жеңилдиктер бирдей шартта берилет жана бизнестин мамлекеттик структураларга жакындыгынан көз каранды эмес деп эсептейт Azattyk Asia © 2026 RFE/RL, Inc. | Бардык укуктар корголгон