УКМК: Чүй облусундагы уюшкан кылмыштуу топтун өкүлдөрү ууру деген түшүнүктөн баш тартышты

«Кыскача маалымат» (АКИpress) - 4-июнда УКМК ыкчам каттоодо турган жана уюшкан кылмыштуу топко катышкан деп мурда соттолгондор менен профилактикалык иш-чара өткөрдү УКМКнын басма сөз кызматы билдиргендей, УКМКнын Чүй облусу боюнча башкармалыгынын имаратында мурда уюшкан кылмыштуу топторго катышкандыгы же кылмыш чөйрөсүндө расмий эмес кызматты ээлегендиги үчүн кылмыш жоопкерчилигине тартылган 28 жаран менен профилактикалык сүйлөшүү өткөрүлдү Жыйындын жүрүшүндө катышуучуларга Кыргызстандын мыйзамдарынын талаптары, мыйзамдуулукту жана укук тартибин сактоонун зарылдыгы эскертилип, ошондой эле уюшкан кылмыштуу топторду жана жамааттарды түзүү жана аларга катышуу, кылмыштуу иш-аракеттерди каржылоо, мыйзамсыз курал-жарак сактоо, мамлекеттик органдардын ишине кийлигишүү жана башка мыйзамсыз аракеттер үчүн кылмыш жоопкерчилиги түшүндүрүлдү Сүйлөшүүнүн жыйынтыгында катышуучулар уурулардын түшүнүктөрүнөн, криминалдык идеологиясынан жана мыйзамсыз аракеттерге катышуудан баш тартышканын билдиришти