Кыргыз Республикасындагы көпчүлүк иш берүүчүлөр ден соолугунун мүмкүнчүлүктөрү чектелүү адамдарды жумушка орноштуруу боюнча квотаны аткарышпайт

Кыргызстанда текшерүүгө алынган 18 уюмдун экөөсү гана майыптарды ишке орноштуруу боюнча мыйзамда белгиленген квотаны аткарат. Бул тууралуу Акыйкатчынын адам жана жаран укуктары менен эркиндиктеринин абалы боюнча жылдык баяндамасында айтылат Мониторинг 2025-жылдын 1-2-декабрында Социалдык кызматтарды өнүктүрүү фонду менен биргеликте жүргүзүлгөн. Аудит 18 уюмду, анын ичинде үч мамлекеттик органды, сегиз жеке компанияны жана жети окуу жайды камтыды Жыйынтык көрсөткөндөй, жумуш орундарына квота боюнча талаптар эки гана мекемеде – Тыныстанов атындагы Ысык-Көл мамлекеттик университетинде аткарылган, анда ден соолугунун мүмкүнчүлүгү чектелген кызматкерлердин үлүшү 4,1%ды, Баткен шаарындагы No57 кесиптик лицейде 9,4%ды түздү Иш берүүчүлөр, эреже катары, квотанын аткарылбай калышын ден соолугунун мүмкүнчүлүгү чектелген талапкерлердин активдүү эместиги менен түшүндүрүшөт Мониторинг ошондой эле инфраструктуранын жеткиликтүүлүгүндө олуттуу көйгөйлөрдү аныктады. Толугу менен ыңгайлаштырылган тоскоолдуксуз чөйрө Кыргызстандын Каржы министрлигинде гана табылган. Көпчүлүк уюмдарда пандустар, лифттер, жеткиликтүү санитардык жайлар, унаа токтотуучу жайлар жана майыптардын эркин жүрүүсү үчүн зарыл болгон башка элементтер жок “Акыйкатчы” институтунун маалыматы боюнча, бул жагдай ден соолугунун мүмкүнчүлүгү чектелген жарандардын эмгекке жана коомдук турмушка толук катышуу мүмкүнчүлүгүн чектеп, социалдык обочолонуу жана дискриминация коркунучун күчөтөт Мындан тышкары, уюмдарда кызматкерлерди инклюзивдик маданият маселелери боюнча системалуу окутуу дээрлик жок. Көбүнчө иш берүүчүлөр инклюзивдик чөйрөдө иштөө үчүн керектүү билимди жана көндүмдөрдү өнүктүрүүгө мүмкүндүк бербеген бир жолку брифингдер менен чектелет Буга чейин 2025-жылдын ноябрь айында Акыйкатчы институту жарандык коомдун өкүлдөрү менен биргеликте өлкөнүн аймактарында бир катар жолугушууларды өткөргөн. Катышуучулар ден соолугунун мүмкүнчүлүктөрү чектелүү адамдарды реабилитациялоо каражаттары менен камсыз кылуу, медициналык кызматтын сапаты, медициналык-социалдык экспертизадан өтүү, билим алуу жана ишке орношууга жеткиликтүүлүк маселелерин көтөрүштү Мониторингдин жыйынтыгы боюнча «Акыйкатчы» институту министрлер кабинетине тоскоолдуксуз чөйрөнү түзүүгө системалуу мамиле жасоону камсыз кылууну жана ар бир аймакта ден соолугунун мүмкүнчүлүгү чектелген адамдар үчүн мамлекеттик реабилитациялык борборлорду ачуу мүмкүнчүлүгүн кароону сунуштады. Эмгек министрлигине жумушка орноштуруу квоталарынын сакталышын көзөмөлдөөнү күчөтүү, ал эми Саламаттыкты сактоо министрлигине реабилитациялык каражаттар менен камсыздоо программаларын кеңейтүү жана медициналык кызматтын сапатын жогорулатуу сунушталды Негизги беттеги иллюстративдик сүрөт: pikabu.ru