Қызылордада апаттан сал болған егінші депутат өтемақы төлемей отыр деп шағымданды

Қызылорда облысы Қармақшы ауданындағы шаруа қожалығында ауыр жарақат алған егінші сал болып қалды. Омыртқасы мен жамбас сүйегіне зақым келген 53 жастағы азаматтың төсек тартып жатқанына бір жылға жуықтаған. Ал еңбек инспекциясының өкілдері бұған жұмыс беруші тікелей кінәлі деген қорытынды шығарыпты. Алайда жарымжан болған жігіт ағасы қожалық басшысы, әрі облыстық мәслихат депутаты әлі күнге дейін жазаланбады, әрі өтемақыны да бермеді деп қынжылады, деп хабарлайды 31-арнаның "Информбюро" ақпараттық бағдарламасы Былтыр күзде егіс алқабынан қайтып келе жатып, апатқа ұшыраған трактордың тіркемесінде болған жолаушылардың бірі – Анарбек Шарапатов. Егінші қожалықта тасымал көлігі тапшы болғандықтан, басшы заңсыз болса да, жұмысшыларды техниканың жүк салғышына отырғызған дейді. Апаттан кейін арбаға таңылған 53 жастағы азамат еңбекке мүлде жарамсыз болып қалдым деп отыр "Төрағамыз да келді. 200 мың ақшалай көмек берілді. Әлде де көмек болады. Бәрің бір-бір үйдің азаматысыңдар, асыраушысыңдар ғой деп уәде беріп кеткен. Бірақ сол уәде сол күйі қалды. Апаттан кейін жамбас сынды, бел омыртқадан үшінші омыртқа деді, сосын жұлын сүйекке тақалып қалған. Тік ішек жыртылған. Үлкен дәрет ұстамайды. Сол қинайды", – деді бірінші топ мүгедегі Анарбек Шарапатов Оқи отырыңыз: 201 мыңға жуық азамат жұмыспен қамтылды: Еңбек министрі Тоқаевқа есеп берді Алайда шаруа қожалығының заңгері жұмысшыларға арналған тасымал көлігі бар дейді. Апатқа ұшыраған трактордың тіркемесіне егіншілердің өздері мінген деп ақталды "5 адам тұрғанда мініп алған, анау екеуі жүгіріп келіп мінген. Енді олар машинаны күтпей тұр ғой. Қалғандарының бәрі машинаны күтіп тұрған. Еңбек заңы бойынша әр адам еңбек қауіпсіздігі туралы сабақтан өтсе, түсіндірілсе, ол қол қойса, өзі міндетті орындауға еңбек заңының талабын", – деді "Жаңа Жол" ЖШС заңгері Молдабек Ахметов Алайда еңбек инспекциясының өкілдері бұл жағдайға тікелей қожалық басшысы кінәлі дейді. Сондықтан өтемақы төлеуге міндетті деп отыр "Арнайы тергеп-тексеру комиссиясының қорытындысы бойынша бұл жерде жұмыс берушінің кінәсі 100 пайыз болып, ал жұмысшының кінәсі 0 пайыз болып акт шығарылған. Егер жазатайым оқиғалардан сақтандыру шарты болған жағдайда сақтандыру компанияларының тарапынан арнайы мөлшерлеме көзделген. Ал шарт болмаған жағдайда ол серіктестік тарапынан өтелуі керек", – деді Қызылорда облысы бойынша мемлекеттік еңбек инспекциясы департаментінің бөлім басшысы Бағлан Жұманов Өздігінен жүріп-тұра алмайтын хәлге түскен азаматтың бес баласы бар. Көпбалалы әке мектепте еден жуушы болып жұмыс істейтін әйелімнің табысымен күнелтіп келеміз дейді. 35 жыл бойы тер төккен жұмысымнан да, денсаулығымнан да бір сәтте айырылдым деген жігіт ағасы серіктестікті сотқа беріп жатыр Осы тақырыптар бойынша жаңалықтар мен мақалалар