Ақтауда еліміздегі алғашқы карбамид өндіретін зауыт салынады

Жобаға инвестицияның жалпы көлемі 804,2 млрд теңгені құрайды Үкімет Индустрия және құрылыс министрлігі мен «KazAzot PRIME» ЖШС арасында «Маңғыстау облысындағы аммиак-карбамид кешені» жобасы бойынша инвестициялық келісімге қол қоюды мақұлдады. Қаулыға Премьер-Министр Олжас Бектенов қол қойды, деп хабарлайды primeminister.kz Ақтауда еліміздегі алғашқы карбамид өндіретін зауыт салынады. Жалпы инвестиция көлемі 804,2 млрд теңгені құрайды. Кәсіпорынды іске қосу 2030 жылға жоспарланған. Құрылыс кезеңінде 1,5 мыңға жуық жұмыс орны, кешен іске қосылғаннан кейін 700 тұрақты жұмыс орны ашылады Болашақ кешеннің қуаттылығы жыл сайын 660 мың тоннаға дейін аммиак, 580 мың тоннаға жуық несепнәр және 500 мың тонна аммиак селитрасын өндіруге мүмкіндік береді Жобаны жүзеге асыру еліміздің агрохимиялық саласын дамыту үшін стратегиялық маңызға ие. Бүгінде несепнәр Қазақстанда өндірілмейді, көршілес елдерден әкелінеді. Несепнәр азотты тыңайтқыш ретінде ауыл шаруашылығында әртүрлі дақылдар үшін барлық топырақта негізгі тыңайтқыш ретінде кеңінен қолданылады және ішкі нарықта сұранысқа ие Жаңа кәсіпорынның іске қосылуы отандық шаруаларды өз өнімімен қамтамасыз етіп, импортқа тәуелділікті азайтып, экспорттық әлеуетті нығайтады Қазіргі уақытта азот тыңайтқыштарын шығаратын жалғыз отандық өндіруші – «ҚазАзот» АҚ. Елімізде Ақтаудағы жобадан бөлек, «СНПС-Ақтөбемұнайгаз» компаниясымен бірлесіп «ҚазЭСТА» және «KMG PetroChem» ЖШС карбамид өндіру бойынша тағы екі ірі жобаны жүзеге асыру жоспарлануда. Бұл азот тыңайтқыштарын өндіру бойынша ішкі қуаттылықты айтарлықтай арттырып, импортқа тәуелділікті азайтады 2030 жылға қарай барлық инвестициялық жобаларды іске қосуды ескере отырып, аммиак өнімдерін өндірудің болжамды көлемі 2,3 млн тоннаға жетеді деп күтілуде. Осы шаралардың арқасында Қазақстан отандық фермерлердің қажеттіліктерін толық қанағаттандырып қана қоймай, айтарлықтай экспорттық әлеуетті құра алады Үкімет бұған дейін Энергетика министрлігі мен «Kazakhstan Success Coking Energy» ЖШС арасында Қарағанды облысында металлургиялық кокс өндіретін зауыт салу жөніндегі инвестициялық келісімді бекіткен болатын. Сондай-ақ Ауыл шаруашылығы министрлігі мен «Азия Алтын Дан» ЖШС арасында Ақмола облысында астықты терең өңдеу зауытының құрылысына инвестициялық келісім бекітілді Жобаға жеке инвестиция көлемі 63,5 млрд теңгені құрайды Kapital.kz іскерлік ақпарат орталығының материалдарымен жұмыс істеу кезінде дереккөзге міндетті гиперсілтемемен мәтіннің тек 30% ғана пайдалануға рұқсат етіледі. Толық материалды пайдалану кезінде редактордың рұқсаты қажет