Ауғанстанда шенеуніктерге смартфон пайдалануға тыйым салынды (видео)

Ауғанстанның жоғарғы жетекшісі әрі «Талибан» қозғалысының басшысы молда Хайбатулла Ахунзада топ мүшелері мен мемлекеттік қызметкерлерге смартфон пайдалануға тыйым салатын жарлық шығарды. Бұл туралы Afghanistan International хабарлайды Басылымның мәліметінше, оның қолында тиісті құжат болған. Онда тәртіп бұзғандар әскери соттарға тапсырылатыны айтылған. Олар қандай жазаға тартылуы мүмкін екені айтылмаған Сондай-ақ, «Afganistan International» агенттігінің хабарлауынша, арнайы тізім жасалған. Онда смартфонды пайдалануға тыйым салынған әрбір адамның аты-жөні, лауазымы, қызмет көрсету орны, ұялы байланыс операторы және телефон нөмірі көрсетіледі Kabul Now хабарлауынша, жарлық шыққаннан кейін әлеуметтік желілерде тәліптер мүшесінің смартфонын қиратып жатқаны түсірілген видео тарай бастады Сонымен қатар, Ауғанстанның Білім министрлігі студенттерге оқу орындарына смартфон әкелуге тыйым салатын жеке қаулы шығарды Бұл шешімдердің немен байланысты екені көрсетілмеген