Шуша туралы кітап Иракта әдеби сыйлық алды

Ирактық профессор Мутаз Мухи Абдулхамидтің «Шуша – Әзірбайжанның інжу-маржаны» атты кітабы Ирактағы саяхат әдебиеті саласындағы Наджи Джавад әл-Саати атындағы сыйлыққа ие болды ҚазАқпараттың хабарлауынша, саяхатшы, жазушы және заңгер Наджи Джавад әл-Саати мұрасын сақтау комитеті мен Бағдад мәдени орталығы сыйлықтың он алтыншы рет берілуінің қорытындысын жариялады. Байыпты академиялық және әдеби бағадан кейін «Шуша – Әзірбайжанның інжу-маржаны» кітабы марапатқа лайық деп танылды. Ирактағы Әзірбайжан елшілігінің қолдауымен Шуша қаласы жылына байланысты іс-шаралар жоспары аясында жарық көрген кітап «Шуша – Қарабақ хандығының астанасы» және «Шуша қаласының соғыс пен бейбітшілік арасындағы мәдени мұрасы» атты екі тараудан тұрады. Кіріспеде автор 44 күнге созылған Отан соғысы туралы мағлұмат беріп, оның басталуының тарихи және саяси себептеріне тоқталады, сондай-ақ Әзірбайжан Республикасы Президентінің соғыс кезінде айтқан сөздері мен сұхбаттарына сілтеме жасай отырып, бірқатар жайттарды нақтылайды. Бұл бөлімде сондай-ақ БҰҰ-ның төрт белгілі қарары мен әртүрлі халықаралық ұйымдардың мәлімдемелері туралы ақпарат көрсетіледі Бірінші тарауда Шуша қаласының іргетасы қаланған күннен бастап бүгінгі күнге дейінгі кезеңді қамтитын оның тарихы баяндалады. Тарихи дереккөздер мен еуропалық шығыстанушы ғалымдардың пікірлеріне сілтеме жасай отырып, автор бұл қаланың ежелгі әзірбайжан қаласы екенін дәлелдейді «Соғыс пен бейбітшілік арасындағы Шуша қаласының мәдени мұрасы» деп аталатын екінші тарау Шуша қаласының мәдениетінің тақырыптарын қамтитын бірнеше бөлімдерден тұрады. Автор Шуша қаласының бай мәдени мұрасы мен көрнекті тұлғалары туралы мәлімет береді. Шуши тұрғындары жасаған мәдениет тек әзірбайжан халқы үшін ғана емес, ислам әлемінің мәдени мұрасы үшін де бірегей үлгі екені баса айтылады. Бұл бөлімде автор Шуша қаласында бой көтерген материалдық мәдениет ескерткіштері, мешіттер, шіркеулер мен қасиетті орындар, керуен сарайлар мен базарлар, сарайлар, мұражайлар мен кітапханалар, олардың өзіндік сәулет өнері мен тарихи маңызы туралы жан-жақты мәлімет береді