Енді дипломатияда кемінде 10 жыл жұмыс істегендер ғана елші болып тағайындалады

Қырғызстанның шет елдердегі елшісі болу үшін кандидаттың дипломатия саласында кемінде он жылдық жұмыс тәжірибесі болуы керек. Бұл талаптар 4 маусымда президент Садыр Жапаров қол қойған «Қырғыз Республикасының дипломатиялық қызметі туралы заңға өзгерістер енгізу туралы» заңда жазылған Оған сәйкес, Қырғызстанның шетелдегі елшісі лауазымына дипломатиялық қызмет органдарында, президент әкімшілігінің бөлімдерінде және халықаралық ынтымақтастық мәселелеріне қызмет көрсететін Жогорку Кенеш аппаратында жұмыс істейтін, кемінде 10 жыл жұмыс өтілі бар қырғыз азаматтары тағайындалады. Бұл ретте елшілікке ел дамуына үлес қосқан азаматтардың кандидатурасы президентке ұсынылуы мүмкін. Өзгерістерге сәйкес, енді Қырғызстанның сыртқы істер министрі консулдарды президенттің рұқсатымен тағайындайды немесе жалдайды. Сонымен қатар, Президент консулдық жарғыны бекітеді және мемлекеттік органдардың сыртқы саясаттағы өзара іс-қимыл тәртібін шешеді. Құжатта дипломатиялық қызметкерлердің жауапкершілігі де күшейтілген. Қажет болған жағдайда дипломатиялық дәрежеден айыру мүмкіндігі де қарастырылған. Дипломатиялық қызмет туралы заңға енгізілген өзгерістер дипломатия саласын жетілдіруге және кадрлық талаптарды күшейтуге бағытталғаны атап өтілді Қырғызстанның шетелдегі елшісі қызметіне тиісті тәжірибесі мен мамандығы жоқ адамдардың тағайындалуы қоғамда түрлі пікірталас тудырды. Бұрын оппозицияда жүрген саясаткерлерді, биліктің ауысуына үлес қосқан журналистерді, депутаттарды елшілікке тағайындау жағдайлары көп болды. (ZKo)