Батыс Қазақстан облысында мемлекеттік қызметшілер арасында 2 мыңнан астам заң бұзушылық анықталды

Өңірлік коммуникациялар қызметінде өткен брифингте ҚР Мемлекеттік қызмет істері агенттігінің Батыс Қазақстан облысы бойынша департаментінің басшысы Мұрат Байсалов мәлім еткендей, қазіргі таңда мемлекеттік қызметкерлердің нақты саны 3197 (әкімдіктерде – 2071, орталық мемлекеттік органдардың бөлімшелерінде – 1126) құрайды. Қолда бар бос жұмыс орындарының саны 218 (әкімдіктерде – 126, орталық мемлекеттік органдардың бөлімшелерінде – 92), бұл жалпы штат санының 6,4% құрайды М.Байсаловтың айтуынша, жыл басынан бері әкімшілік мемлекеттік қызметке 137 адам тағайындалған. Мемлекеттік қызметшілердің 1315-і немесе 41%-ы ерлер, 1882-і немесе 59%-ы әйелдер — Мемлекеттік қызмет туралы заңнама талаптарының және қызметтік этика стандарттарының сақталуына мониторинг жүргізу аясында ағымдағы жылы 45 бақылау іс-шарасы өткізіліп, нәтижесінде 2087 заң бұзушылық анықталды. Мемлекеттік органдарға 14 тапсырма мен ұсыныс енгізіліп, оның 11-і орындалды, қалған үшеуі орындалу үстінде. Енгізілген ұсыныстар мен тапсырмаларды қарау қорытындысы бойынша мемлекеттік қызметке қатысты жоюға жататын 428 заң бұзушылық жойылды, деді спикер Оның айтуынша, әдеп жөніндегі кеңес тәртіптік істерді қарау қорытындысы бойынша алты лауазымды тұлғаға түрлі тәртіптік жазалар қолданған. Департамент басшылығымен «Сыбайлас жемқорлыққа қарсы іс-қимыл туралы» Заңында көзделген декларациялардың мемлекеттік кірістер органдарына тапсырылуына бақылау жасалды. Нәтижесінде білім, денсаулық сақтау, мәдениет, спорт, ветеринария ұйымдарында, сондай-ақ облыс қалалары мен аудандары әкімдіктерінде 100 лауазымды тұлғаның декларацияны мерзімінде ұсынбағаны немесе мүлдем ұсынбағаны анықталды. Осыған сәйкес жауапты тұлғаларға 90 тәртіптік шара қолданылды "Сонымен қатар, өткен жылдан бүгінгі күнге дейін облыста 21 мемлекеттік қызметшінің әрекетінде шектеулерді сақтамау белгілері анықталды. Кейбір мемлекеттік қызметкерлердің кәсіпкерлікпен айналысу фактілері анықталды. Мемлекеттік қызметшілер арасында ойынға әуес болу фактілері де бар. Осы фактілер бойынша олардың барлығын теріс себептермен жұмыстан босату туралы шешім шығарылды", - деді М.Байлов Бұған дейін хабарлағанымыздай, Қазақстан Республикасы Мемлекеттік қызмет істері агенттігінің Батыс Қазақстан облысы бойынша Әдеп жөніндегі кеңесінің отырысында аудандық мәслихат сессиясында әдепсіз мінез-құлық пен дөрекі сөйлегені үшін ауыл әкіміне қатаң сөгіс жарияланған болатын