Қаланың сәулеттік келбеті жаңарады

Алматының келбетін айшықтайтын көне нысандардың сәулеттік келбеті жаңаруда. Қазір қалада тұрғын үйлердің қасбеттерін әрлеу жұмыстары қарқынды жүріп жатыр. Басты мақсат - сәулеттік мұраны сақтай отырып, шаһардың көркін келтіру. Мамандар, тарихи маңызы бар ғимараттардың өзіндік ерекшелігі өзгермейтінін айтады.Алматының қақ ортасындағы бұл тұрғын үй 1958 жылы теміржолшылар үшін салынған. Қала тұрғындары оны «Түрксіб үйі» деп те атайды. Жылдар өте ғимараттың сыртқы әрлеуі ескіргенімен, сәулеттік келбеті мен тарихи құндылығы сақталған. Сондықтан, мұндай нысандарды жаңарту кезінде бастапқы архитектуралық шешімдер еш өзгеріссіз қалады.Тимур Ақатжанов, «Q-LAB» әлеуметтік жобалау бөлімінің басшысы:Жаңғырту жұмыстарының бірінші түрі бойынша, ғимараттардың тарихи келбеті сақталып, тек сылақ қабаты жаңартылып, қайта боялады. Екінші бағытта, қатты тозған қасбеттер заманауи талаптарға сай реттеледі. Яғни, өңін жоғалтқан үйлер неоклассикалық стильде жаңаланады. Нысанның сәулеттік үйлесімін арттыратын сәндік элементтерді де қосуды жөн көрдік.Мәселен, панелден соғылған дәл осындай үйлердің сыртқы келбеті өзгермек. Яғни, сәулеттік шешімі қарапайым немесе уақыт өте көркін жоғалтқан тұрғын үйлердің қасбеттері табиғи тас пен гранит секілді сапалы материалдармен әрленеді. Биыл Медеу ауданындағы 50 көпқабатты тұрғын үйге осындай жаңарту жұмысы жүргізілмек.Дамир Данияров, Медеу ауданы әкімдігі коммуналдық шаруашылық бөлімінің бас маманы:Барлық нысанға техникалық тексерісті тәуелсіз мекемелер сараптама жүргізіп, тексерді. Содан кейін, қайта жөндеу жұмыстарына кірісіп жатыр. Табиғи тас, гранит сияқты құрылысқа қажетті материалдар өзіміздің отандық өнімдер.Жыл соңына дейін Алматыдағы ірі көшелер бойында орналасқан 170 көппәтерлі тұрғын үйдің қасбеті жаңармақ. Бұл жұмыстар қаланың сәулеттік келбетін жақсартып қана қоймай, тұрғындардың өмір сүру ортасын да жайлы ете түспек. Ал мердігер мекемелер атқарылған жұмыстарға екі жыл кепілдік береді