Vüsal Aslanov: Sərnişinlər nəqliyyat növləri arasında daha rahat hərəkət edə biləcəklər

“Bakı Metropoliteni” Qapalı Səhmdar Cəmiyyətinin “BakuBus” və “Bakı Taksi Xidməti” Məhdud Məsuliyyətli Cəmiyyətləri ilə birləşmə formasında yenidən təşkili ölkəmizdə, xüsusən də Bakıda ictimai nəqliyyatın inkişafında keyfiyyətcə yeni mərhələnin başlanğıcıdır AZƏRTAC xəbər verir ki, bunu “Bakı Metropoliteni” QSC-nin sədri Vüsal Aslanov “Trend” Beynəlxalq İnformasiya Agentliyinə və “Azad Azərbaycan” (ATV) telekanalına müsahibəsində deyib Onun sözlərinə görə, bu gün dünyada ayrı-ayrı nəqliyyat vasitələri deyil, şəhərlərin ümumi hərəkətliliyi müzakirə olunur "15 ildən artıqdır ki, dünyanın aparıcı şəhərlərində tətbiq edilən bu mexanizm sərnişinləri daha əlçatan, əlaqələndirilmiş və komfortlu nəqliyyatla təmin etmək məqsədi daşıyır. Sərnişinlər indi metro, avtobus, tramvay və digər nəqliyyat növlərindən ayrılıqda deyil, vahid, bir-birini tamamlayan nəqliyyat şəbəkəsinin elementləri kimi istifadə edəcəklər. Müxtəlif nəqliyyat növlərindən daxil olan məlumatlar vahid mərkəzdə emal olunacaq, qərar qəbul ediləcək və təhlil ediləcək. London, Paris, Berlin, Honq-Konq və Sinqapur kimi, bu təcrübə də uzun müddətdir ki, istifadə olunur Bizim əsas məqsədimiz ondan ibarətdir ki, metro, avtobus və taksilərin xidmətləri təkrarlanmasın, əksinə, bir-birini tamamlasın. Metrodan çıxıb avtobus dayanacağına və ya taksi dayanacağına gedərkən sərnişin vahid xidmət zəncirinin davamını hiss etməlidir. Gələcəkdə bu, həm vahid ödəniş sisteminin, həm də vahid trafik cədvəllərinin tətbiqini daha da sadələşdirəcək Bu Fərman BakuBus və Bakı Taksi şirkətlərini əhatə edir. “BakuBus” dövlət şirkətidir və paytaxtda bir çox marşrut xətləri ilə yanaşı, Gəncə və Xankəndində də fəaliyyət göstərir. “Bakı Taksi Xidməti” sərnişinlərimiz tərəfindən “London taksiləri” adlandırılan xüsusi avtomobillərdən ibarətdir. Fərman məhz bu sahəyə yönəlib. Digər marşrut xətləri və avtobus xidmətləri müstəqil fəaliyyət göstərməyə davam edəcək” V.Aslanov vurğulayıb ki, sərnişinlər nəqliyyat növləri arasında köçürmələri daha rahat həyata keçirə biləcəklər: "Nümunə kimi göstərdiyim şəhərlərdə həftəlik, saatlıq, aylıq paketlər var. Bu, belə ödəniş həllərinin işə salınması üçün ilk addımlardan biridir. Gələcəkdə biz kompleks ödənişlərin həyata keçirilməsi məqsədinə doğru irəliləyə biləcəyik", - Bakı Metropoliteninin sədri əlavə edib