“Qarabağ şikəstəsi”ni bir az marş ritminə salıblar” - Alim Qasımov

“Qarabağ şikəstəsi”ni bir az marş ritminə salıblar. Mənə elə gəlir ki, şikəstə “Kəsmə şikəstə” ahəngində nə qədər ağır olsa, daha yanğılı alınar” Bu fikirləri Xalq artisti, görkəmli muğam ustası Alim Qasımov bildirib Onun fikrincə, “Qarabağ şikəstəsi”nin yanğısını ansambl, orkestr ilə çox gur çalırlar: “Nəticədə şikəstə gəlib Heyratı ahənginə, ritminə düşür və yanğı, şikəstəlik, həzinlik itir. Belə olanda oxuyanın də zəhməti, sənətkarlığı itib gedir. “Qarabağ şikəstəsi” əvvəlki, ilkin halında - 1,5 oktava aşağı tonallıqda oxunsa, daha effektli alınar. Biz bir neçə dəfə məşqlərimizdə bunu etmişik, pis də alınmayıb. O vaxtlar məşqlərimizi çəkirdik, yəqin hansısa lentdə də qalıb. Hər halda bu barədə fikirləşməyə dəyər. Ya mən, ya başqa bir xanəndə buna cəhd eləsə, inanıram ki, maraqlı olacaq” Xalq artisti Alim Qasımovun bu fikirləri tanınmış teatrşünas-tənqidçi, jurnalist, Əməkdar incəsənət xadimi İlham Rəhimlinin bu günlərdə “525”in redaksiyasına təqdim etdiyi, görkəmli muğam ustası ilə müxtəlif vaxtlarda etdiyi söhbətlər əsasında hazırladığı yazısından götürülüb. Yazıda Xalq artistinin müxtəlif məsələlərlə bağı maraqlı fikirləri yer alıb Yazı bötüv şəkildə “525-ci qəzet”in həftənin cümə günü – mayın 1-də nəşr olunacaq növbəti sayında işıq üzü görəcək