Prezident İlham Əliyevin Gürcüstana dövlət səfəri mühüm dönüş nöqtəsidir - ŞƏRH

Azərbaycan–Gürcüstan münasibətləri Cənubi Qafqazda sabitliyin və regional əməkdaşlığın ən uğurlu nümunələrindən biri kimi inkişafını davam etdirir. Ötən əsrin 90-cı illərində hər iki ölkə bölgədəki münaqişələr və geosiyasi qeyri-müəyyənliklər fonunda əməkdaşlığı gücləndirmək, xarici bazarlara çıxışı genişləndirmək və regional sabitliyi təmin etmək məqsədilə birgə hərəkət etməyə ehtiyac hiss edirdi. Bu gün isə bu münasibətlərin artıq klassik ikitərəfli diplomatik çərçivəni aşaraq çoxölçülü strateji tərəfdaşlığa çevrildiyi açıq şəkildə görünür. Siyasi müstəvidə qarşılıqlı etimad, suverenlik və ərazi bütövlüyünə verilən güclü dəstək; iqtisadi sahədə isə artan ticarət dövriyyəsi və qarşılıqlı investisiyalar bu tərəfdaşlığın əsas sütunlarını təşkil edir Bu barədə AZƏRTAC-a açıqlamasında Ankara Hacı Bayram Vəli Universitetinin Beynəlxalq əlaqələr fakültəsinin dosenti, siyasi ekspert Bahar Özsoy bildirib Onun sözlərinə görə, Prezident İlham Əliyevin aprelin 6-da Gürcüstana dövlət səfərini bu strateji tərəfdaşlığın daha da dərinləşdirilməsi baxımından mühüm dönüş nöqtəsi hesab etmək olar: “Bu səfər yalnız mövcud əməkdaşlıq istiqamətlərinin təsdiqi deyil, həm də yeni tərəfdaşlıq perspektivlərinin formalaşdırılması baxımından kritik əhəmiyyət kəsb edir Xüsusilə enerji və nəqliyyat layihələri kontekstində Gürcüstanın tranzit ölkə rolu ilə Azərbaycanın enerji təchizatçısı statusu bir-birini tamamlayan əsas elementlər kimi ön plana çıxır. Bu çərçivədə Bakı–Tbilisi–Ceyhan Neft Kəməri və Cənub Qaz Dəhlizi kimi layihələr Azərbaycanın karbohidrogen ehtiyatlarını Rusiya və İran xaricindəki marşrutlar vasitəsilə birbaşa dünya bazarlarına çıxarmağa imkan verib, Gürcüstana isə tranzit gəlirləri, enerji təminatında etibarlılıq və artan geostrateji əhəmiyyət qazandırıb Eyni zamanda, bu xətlər Avropanın enerji təchizatının şaxələndirilməsinə töhfə verərək regional asılılıqları azaldıb və Cənubi Qafqazı qlobal enerji və ticarət şəbəkələrinin kritik bir hissəsinə çevirib Bu kontekstdə Gürcüstanın regional rolu yalnız enerji və nəqliyyatla məhdudlaşmır. Bu gün Azərbaycan ilə Ermənistan arasında birbaşa iqtisadi münasibətlərin olmadığı şəraitdə ticarətin Gürcüstan üzərindən həyata keçirilməsi Tbilisiyə Cənubi Qafqazdakı iqtisadi dövriyyənin fasiləsizliyini təmin edən mühüm vasitəçi rolunu verir. Bu, bir tərəfdən regional izolyasiya risklərini qismən yumşaldır, digər tərəfdən isə dolayı yolla iqtisadi qarşılıqlı əlaqə kanallarını açıq saxlayaraq normallaşma prosesinə zəmin yaradan praqmatik funksiyanı yerinə yetirir Qarşıdakı dövrdə Azərbaycan–Gürcüstan münasibətlərinin daha da dərinləşəcəyi gözlənilir. Xüsusilə yaşıl enerji, Orta Dəhliz çərçivəsində logistika və nəqliyyat infrastrukturunun genişləndirilməsi, rəqəmsal iqtisadiyyat və üçüncü ölkələrdə birgə investisiya layihələri kimi sahələr yeni əməkdaşlıq imkanları təqdim edir. Bununla yanaşı, regional sülhün təmin edilməsi kontekstində Azərbaycan ilə Ermənistan arasındakı normallaşma prosesində Gürcüstanın oynadığı rol da diqqət çəkir Bu əməkdaşlıq sahələrinin genişlənməsi və gələcəkdə Ermənistanın da bu prosesə əlavə edilməsi Cənubi Qafqazda qalıcı sülhün bərqərar olmasına, iqtisadi inteqrasiyanın güclənməsinə və bölgənin qlobal sistemlə daha möhkəm şəkildə inteqrasiya olunmasına töhfə verəcək. Beləliklə, iki ölkənin qurduğu bu tərəfdaşlıq modeli regionun gələcəyi baxımından müəyyənedici çərçivə təqdim etməyə davam edəcək”,- deyə Bahar Özsoy qeyd edib 2026 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır