Mustafa Söğüt: Azərbaycanın enerji diplomatiyası ölkəni regionun strateji əməkdaşlıq mərkəzlərindən birinə çevirib

Son onilliklər ərzində Azərbaycan enerji resurslarının səmərəli idarə olunması və uğurlu diplomatik siyasəti sayəsində regionun aparıcı dövlətlərindən birinə çevrilib. Xüsusilə dünya okeanlarına birbaşa çıxışı olmayan ölkə kimi Azərbaycanın neft və qaz ehtiyatlarını beynəlxalq bazarlara çıxarması müasir dövrün ən uğurlu enerji diplomatiyası nümunələrindən biri hesab olunur. Bu siyasət təkcə iqtisadi inkişafı təmin etməyib, eyni zamanda ölkənin beynəlxalq nüfuzunu artıraraq regional əməkdaşlığın genişlənməsinə mühüm töhfə verib Bu fikirləri AZƏRTAC-a açıqlamasında türkiyəli siyasi ekspert Mustafa Söğüt bildirib Onun sözlərinə görə, Azərbaycanın enerji siyasətinin əsas üstünlüklərindən biri iqtisadi maraqlarla diplomatik fəaliyyətin vəhdət təşkil etməsidir. Müstəqilliyin ilk illərindən etibarən ölkə rəhbərliyi enerji ehtiyatlarının dünya bazarlarına çıxarılmasını strateji prioritet kimi müəyyənləşdirərək bu istiqamətdə ardıcıl addımlar atıb “Azərbaycanın coğrafi mövqeyi nəzərə alındıqda əldə olunan nəticələrin miqyası daha aydın görünür. Dünya okeanlarına çıxışı olmayan ölkənin enerji resurslarını Avropa və digər beynəlxalq bazarlara təhlükəsiz şəkildə çatdırması yalnız iqtisadi imkanlarla deyil, eyni zamanda uğurlu xarici siyasət və etibarlı tərəfdaşlıq münasibətləri ilə mümkün olub. Azərbaycan region dövlətləri ilə qarşılıqlı hörmət və faydaya əsaslanan münasibətlər quraraq mürəkkəb geosiyasi şəraitdə mühüm nəticələr əldə edib. Enerji layihələrinin həyata keçirilməsi üçün ilk növbədə qonşu ölkələrlə etimad mühitinin yaradılması vacib idi. Azərbaycan bu istiqamətdə həm regional əməkdaşlığın inkişafına, həm də beynəlxalq tərəfdaşlarla münasibətlərin möhkəmləndirilməsinə xüsusi diqqət yetirib”, – deyə ekspert vurğulayıb Mustafa Söğüt qeyd edib ki, enerji marşrutlarının şaxələndirilməsi siyasəti Azərbaycanın beynəlxalq əhəmiyyətini daha da artırıb. Bu gün ölkə yalnız enerji ixracatçısı kimi deyil, həm də müxtəlif regionlar arasında iqtisadi və siyasi əməkdaşlığı gücləndirən etibarlı tərəfdaş kimi tanınır: “Azərbaycanın enerji strategiyası uzunmüddətli baxış üzərində qurulub. Məhz buna görə ölkə enerji sahəsində qazandığı uğurları digər istiqamətlərdə də inkişaf üçün istifadə edə bilib. Nəticədə enerji sektoru iqtisadiyyatın lokomotivinə çevrilərək infrastrukturun yenilənməsinə, yeni iş yerlərinin açılmasına və sosial rifahın yüksəlməsinə xidmət edib. Azərbaycanın enerji siyasətində Türkiyə ilə əməkdaşlıq xüsusi yer tutur. İki qardaş ölkə arasında formalaşan strateji münasibətlər enerji sahəsindəki uğurların əsas dayaqlarından biridir. Azərbaycan və Türkiyə arasında münasibətlər sadəcə tərəfdaşlıq deyil, ortaq strateji baxışın ifadəsidir. Enerji layihələri bu əməkdaşlığın mühüm istiqamətlərindən biri olsa da, son illərdə əlaqələr nəqliyyat, logistika, müdafiə sənayesi, ticarət, investisiya və humanitar sahələri də əhatə edən geniş əməkdaşlıq modelinə çevrilib. Bu model region ölkələri üçün uğurlu əməkdaşlıq nümunəsi hesab oluna bilər” Ekspert bildirib ki, Azərbaycan-Türkiyə əməkdaşlığı nəticəsində regionun geoiqtisadi əhəmiyyəti önəmli dərəcədə artıb. İki ölkənin birgə həyata keçirdiyi layihələr Şərqlə Qərb arasında əlaqələrin güclənməsinə, yükdaşımaların artmasına və yeni iqtisadi imkanların yaranmasına şərait yaradıb Mustafa Söğütun fikrincə, Azərbaycanın enerji diplomatiyası təkcə iqtisadi dividendlərlə məhdudlaşmır. Bu siyasət eyni zamanda regional sabitliyin möhkəmləndirilməsinə, dövlətlər arasında qarşılıqlı etimadın artırılmasına və uzunmüddətli əməkdaşlıq platformalarının formalaşdırılmasına xidmət edir 2026 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır