Makronun zəifləyən nüfuzu fonunda Azərbaycana qarşı kampaniyası - TƏHLİL

Fransa ilə Azərbaycan arasında son illərdə müşahidə olunan siyasi gərginlik artıq təkcə diplomatik müstəvi ilə məhdudlaşmır. Bu qarşıdurma informasiya məkanına da daşınıb və xüsusilə Fransa dövlətinə yaxın media qurumlarının fəaliyyətində özünü daha açıq göstərir. Azərbaycanın suverenliyini bərpa etməsi, enerji sahəsində Avropa üçün strateji tərəfdaşa çevrilməsi və Fransanın neokolonial siyasətini beynəlxalq gündəmə çıxarması Parisdə ciddi narahatlıq yaradıb. Nəticədə Azərbaycan əleyhinə sistemli informasiya kampaniyalarının şahidi oluruq Bu prosesin zamanlaması da diqqət çəkir. Prezident Emmanuel Makronun həm ölkə daxilində, həm də beynəlxalq arenada nüfuz itkisi ilə üzləşdiyi bir dövrdə Fransa mediasının Azərbaycana qarşı aktivləşməsi təsadüfi görünmür. Son illər Makron hökuməti "sarı jiletlilər" etirazlarından tutmuş pensiya islahatlarına qarşı kütləvi aksiyalara, miqrasiya böhranından təhlükəsizlik problemlərinə qədər çoxsaylı daxili çağırışlarla qarşılaşıb. Fransa cəmiyyətində hakimiyyətə inamın azalması fonunda xarici siyasətdə də Paris əvvəlki təsir imkanlarını qorumaqda çətinlik çəkir Belə bir şəraitdə informasiya gündəminin xarici istiqamətə yönəldilməsi klassik siyasi texnologiyadır. Azərbaycanın hədəfə alınması isə təsadüfi seçim deyil. Çünki Bakı son illərdə Fransanın uzun müddət toxunulmaz hesab etdiyi mövzulara – neokolonializmə, dənizaşırı ərazilərdə insan hüquqları problemlərinə və milli azlıqların hüquqlarına diqqət çəkməyə nail olub Qarabağ kartı və "seçilmiş müxalifət" strategiyası Fransa mediasının son dövrlərdə Qarabağ mövzusunu yenidən gündəmə gətirmək cəhdləri də bu siyasətin tərkib hissəsi kimi görünür. Regionda münaqişə faktiki olaraq başa çatdığı və Azərbaycanın ərazi bütövlüyü beynəlxalq səviyyədə tanındığı halda, bəzi media platformaları köhnə narrativləri yenidən dövriyyəyə buraxmağa çalışırlar Bu kampaniyanın digər istiqaməti isə Azərbaycanın radikal müxalifət nümayəndələrinə beynəlxalq tribunaların təqdim edilməsidir. Xüsusilə Fransa dövlət mediası hesab olunan France 24-ün AXCP sədri Əli Kərimlidən müsahibə alaraq onu "vicdan məhbusu" kimi təqdim etməsi diqqət çəkir. Burada əsas məqsəd alternativ siyasi mövqeləri işıqlandırmaqdan daha çox, müəyyən siyasi fiqurları beynəlxalq auditoriyaya xüsusi statusda təqdim etmək təsiri bağışlayır Eyni zamanda Fransada baş verən adi kriminal hadisələrin Azərbaycanla əlaqələndirilməsi və ya siyasiləşdirilməsi cəhdləri də müşahidə olunur. Bəzi hallarda hüquqi və ya məişət xarakterli məsələlər siyasi təqib kimi təqdim edilir, bununla da Azərbaycan haqqında mənfi təsəvvür formalaşdırmağa çalışılır Yeni Kaledoniyada repressiya, Azərbaycanda "insan haqları" dərsi Fransanın Azərbaycanla bağlı ritorikasında ən çox diqqət çəkən məqamlardan biri ikili standartlardır Paris bir tərəfdən Azərbaycanda "siyasi məhbuslar", "demokratiya problemləri" və "insan hüquqları" mövzularını qabartmağa çalışır, digər tərəfdən isə öz nəzarətində olan ərazilərdə tamamilə fərqli yanaşma nümayiş etdirir Yeni Kaledoniyada baş verən hadisələr bunun ən bariz nümunəsidir. Son illərdə burada müstəqillik tərəfdarlarına qarşı kütləvi həbslər həyata keçirilib, fövqəladə tədbirlər tətbiq olunub, etiraz aksiyaları sərt şəkildə dağıdılıb. Buna baxmayaraq, həmin hadisələr Fransa mediasında Azərbaycanın daxili məsələləri qədər geniş işıqlandırılmır Eyni vəziyyət Korsikada da müşahidə olunur. Paris uzun illər Korsika dilinin və yerli identikliyin tam tanınmasına müqavimət göstərib. Bu gün isə Korsikanın muxtariyyətə yaxınlaşması müzakirə mövzusuna çevrilib. Əslində bu proseslər Fransanın daxilində mövcud olan siyasi və etnik problemlərin göstəricisidir Məhz bu məqamda Bakı Təşəbbüs Qrupunun fəaliyyəti ön plana çıxır. Son illərdə BTQ Yeni Kaledoniya, Korsika, Fransız Polineziyası və digər ərazilərdəki vəziyyəti beynəlxalq müzakirə predmetinə çevirə bilib. Fransa üçün narahatlıq doğuran məqam da budur. Çünki ilk dəfə olaraq Paris özü insan hüquqları və öz müqəddəratını təyinetmə məsələləri üzrə suallar qarşısında qalır France 24 və Parisin diplomatik uğursuzluqlarına cavab cəhdi Azərbaycanın Fransa mediasında hədəfə çevrilməsinin digər səbəbi Bakının son illərdə qazandığı geosiyasi nailiyyətlərlə bağlıdır Qarabağ üzərində tam suverenliyin bərpası, Avropanın enerji təhlükəsizliyində mühüm rol oynayan tərəfdaşa çevrilməsi, Türk Dövlətləri Təşkilatı çərçivəsində fəallığın artması və neokolonializmə qarşı beynəlxalq platformalarda aparılan fəaliyyət Azərbaycanın mövqelərini gücləndirib Fransanın dövlət maliyyəsi hesabına fəaliyyət göstərən media qurumlarının bu uğurları kölgələməyə çalışması təsadüfi deyil. France 24 və oxşar platformalarda yayımlanan materiallar əslində Azərbaycanın uğurlu diplomatiyasına verilən siyasi reaksiyanın media müstəvisində davamı kimi görünür Cənubi Qafqazda vasitəçidən tərəfə çevrilən Fransa Makron administrasiyasının Cənubi Qafqaz siyasəti də ayrıca müzakirə mövzusudur. Paris son illərdə regionda vasitəçi olmaq iddiasından uzaqlaşaraq açıq şəkildə Ermənistana yaxın mövqe nümayiş etdirib. Bu isə Fransanın neytral aktor kimi qəbul edilməsinə ciddi zərbə vurub Makronun Ermənistana münasibətdə nümayiş etdirdiyi birtərəfli yanaşma, regiondakı reallıqları nəzərə almayan açıqlamaları və balanslı siyasətdən uzaq davranışı Fransanın nüfuzuna əlavə zərər vurub. Nəticədə Paris həm region ölkələri, həm də beynəlxalq müşahidəçilər tərəfindən getdikcə daha çox tərəf kimi qəbul edilir Diqqəti problemlərdən yayındırmaq cəhdi Bütün bu faktorlar birlikdə göstərir ki, Fransa mediasında Azərbaycana qarşı aparılan kampaniyalar yalnız jurnalist marağı ilə izah oluna bilməz. Burada həm Fransanın daxili siyasi problemlərindən diqqəti yayındırmaq, həm neokolonial siyasətlə bağlı artan tənqidlərə cavab vermək, həm də Azərbaycanın beynəlxalq uğurlarını kölgələmək cəhdi görünür Kriminal hadisələrin siyasiləşdirilməsi, seçilmiş siyasi fiqurların "demokratiya qəhrəmanı" kimi təqdim olunması, Qarabağ mövzusunun yenidən aktuallaşdırılması və insan haqları ritorikasının selektiv şəkildə tətbiq edilməsi müasir hibrid müharibənin əsas elementləri hesab olunur Bu mənada Azərbaycanın hədəfə çevrilməsi təkcə iki ölkə arasındakı fikir ayrılıqlarının nəticəsi deyil. Bu, həm də Fransanın zəifləyən geosiyasi mövqelərini və artan reputasiya problemlərini kompensasiya etmək üçün istifadə olunan informasiya strategiyasının bir hissəsi kimi qiymətləndirilə bilər