Hindistanda qayıq batdı: 3 nəfər ölüb, 3 nəfər itkin düşüb

Hindistanın Uttar Pradeş ştatında bir ailəni daşıyan qayığın çayda aşması nəticəsində 3 nəfər ölüb, 3 nəfər itkin düşüb. Ötən gecə Hindistanın şimalında Uttar Pradeş ştatının Hamirpur bölgəsindən keçən Yamuna çayında qayıq qəzası baş verib Toy mərasimindən sonra meyvə yığmaq üçün çayın qarşı sahilinə çıxan 9 nəfərlik ailəni daşıyan qayıq güclü yağış səbəbindən geri dönərkən aşıb. Yerli hakimiyyət orqanlarından verilən açıqlamada, suya düşən 9 nəfərdən 3-nün öz imkanları və ərazidəki balıqçıların köməkliyi ilə xilas edildiyi bildirilib Bölgəyə ezam olunmuş milli və yerli axtarış-xilasetmə qruplarının səyi nəticəsində biri qadın olmaqla 3 nəfərin cəsədi tapılıb. Çayda itən 3 uşağın axtarış-xilasetmə işlərinin dalğıcların iştirakı ilə davam etdirildiyi bildirilib. Səlahiyyətlilər axtarışların davam etdiyi və çətin şəraitlə əlaqədar insanları çay sahillərindən uzaq durmağa çağırıb