Cevdet Yılmaz: Orta Dəhliz dünya ticarəti üçün təhlükəsiz və zəruri marşruta çevrilib

Orta Dəhliz dünya ticarəti üçün təhlükəsiz və zəruri marşruta çevrilib. AZƏRTAC “Anadolu” agentliyinə istinadla xəbər verir ki, bu fikri Türkiyənin vitse-prezidenti Cevdet Yılmaz Aşqabada səfəri çərçivəsində Türkmənistan hökumətinin nümayəndələri ilə keçirilən iclasda bildirib C. Yılmaz qeyd edib: “Bu gün qlobal ticarət və təchizat zəncirləri böyük transformasiya yaşayır. İllərdir istifadə edilən Şimal Dəhlizi bölgəmizdəki geosiyasi gərginliklər və münaqişələr səbəbindən gözlənilməz hala gəlib. Digər tərəfdən, Cənub marşrutu həm təhlükəsizlik riskləri, həm də struktur problemləri səbəbindən tutum məhdudiyyətlərini artırır. Belə bir ssenaridə Xəzər dənizindən keçən Orta Dəhliz yalnız alternativ deyil, həm də dünya ticarəti üçün təhlükəsiz və zəruri marşruta çevrilib” Vitse-prezident bildirib ki, Orta Dəhliz təkcə Türkmənistan və Türkiyənin ticarətini deyil, həm də bütün Avrasiyanın yükünü, enerjisini və gələcəyini daşıyacaq əsas onurğa sütunu olacaq: “Bu xətt nə qədər güclüdürsə, gömrük və tranzit proseslərimiz nə qədər sürətlidirsə, bu xətt üzərində quracağımız ortaq rifah da bir o qədər davamlı və sarsılmaz olacaq” O əlavə edib ki, Türkiyə Türkmənistan qazının Xəzər tranzit boru kəmərləri vasitəsilə Avropaya nəqli üçün hər cür əməkdaşlıq etməyə qərarlıdır. Enerji sektorundakı bu sarsılmaz tərəfdaşlıq həm Türk dünyasının iqtisadi inteqrasiyasına töhfə verəcək, həm də Xəzər dənizini qlobal əlaqə mərkəzinə çevirəcək 2026 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır