Azərbaycan parfümeriya xammalı Fransada: “Lecheq” “SIMPPAR 2026”da

“Lecheq Farm & Distillery” Fransanın Qras şəhərində keçirilən və parfümeriya sənayesi üçün təbii xammallara həsr olunmuş dünyanın ən mühüm tədbirlərindən biri sayılan “SIMPPAR 2026” sərgisində Azərbaycanı uğurla təmsil edib AZƏRTAC xəbər verir ki, sərgi çərçivəsində “Lecheq” komandası qlobal ətir sənayesinin müxtəlif nümayəndələrini – tanınmış parfümerləri, ətir evlərini, xammal təchizatçılarını və sahə üzrə ekspertləri stendində qəbul edib. Şirkətin sərgi sahəsi qızılgül yağı, qızılgüldən əldə olunan komponentlər və Qafqaz regionunda yetişdirilən botaniki məhsulların artan potensialı ətrafında müzakirələrin aparıldığı mühüm görüş məkanına çevrilib Sərgidə iştirakla yanaşı, “Lecheq Farm & Distillery” xüsusi dəvət əsasında şirkətin Latın Amerikası (LATAM) və Cənub-Şərqi Asiya bazarlarında qlobal tərəfdaşı olan “Ultra NL”in baş qərargah şourumu “Maison Sanganeria”da da məhsullarını təqdim edib Sərgi həftəsi ərzində beynəlxalq parfümeriya ictimaiyyətinin nüfuzlu nümayəndələri burada bir araya gələrək, “Lecheq” üçün mövcud tərəfdaşlıqları möhkəmləndirmək və aromatik xammallarını təqdim etmək baxımından mühüm imkan yaradıb. Qonaqlar şirkətin təbii inqrediyentlərindən ilhamlanaraq, hazırlanmış kokteyllərdən dadmaqla yanaşı, “Lecheq” məhsulları ilə yaxından tanış olmaq imkanı əldə ediblər. Bu unikal sensor təcrübə Azərbaycanın zəngin botaniki irsini və təbii ehtiyatlarını ön plana çıxarıb Sərgi çərçivəsində Qras şəhərinin meri Jerom Vio ilə görüş olub. Görüş zamanı “Lecheq” nümayəndələri Vionu Azərbaycana dəvət edərək, ölkənin müasir efir yağları sənayesinin mərkəzi hesab olunan Zaqataladakı qızılgül sahələri, üzvi plantasiyalar və distillə müəssisələri ilə yaxından tanış olmağa çağırıblar Sərgi “Lecheq Farm & Distillery” üçün mövcud tərəfdaşlıqları gücləndirmək, yeni işgüzar əlaqələr qurmaq və Azərbaycanın təbii aromatik xammallarının yüksək keyfiyyətini və izlənilə bilən mənşəyini nümayiş etdirmək baxımından əhəmiyyətli imkanlar təqdim edib. Sərgi iştirakçılarının nümayiş etdirdiyi yüksək maraq Azərbaycanın premium təbii inqrediyentlərin yeni və perspektivli mənşə məkanı kimi getdikcə daha çox tanındığını bir daha təsdiqləyib. Məşhur qızılgül plantasiyalarından tutmuş lavanda, nanə, muskat adaçayı və Qafqazın digər botaniki sərvətlərinə qədər Azərbaycanın təbii resursları parfümeriya dünyasının ən nüfuzlu adlarının diqqətini cəlb etməyə davam edir. Təbii, orijinal və mənşəyi tam izlənilə bilən xammallara qlobal tələbatın artdığı bir dövrdə “Lecheq Farm & Distillery” Azərbaycanı beynəlxalq arenada layiqincə təmsil etmək və Qafqazın unikal aromatik xəzinələrini dünya ilə bölüşmək missiyasına sadiq qalacağını bəyan edib 2026 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır