Azərbaycan və Özbəkistan aqrar-sənaye əməkdaşlığına dair danışıqlar aparıb (FOTO)

BAKI, Azərbaycan, 5 may. Mayın 5-də kənd təsərrüfatı naziri Məcnun Məmmədov 19-cu Azərbaycan Beynəlxalq Kənd Təsərrüfatı Sərgisində (Caspian Agro Week) iştirak edən Özbəkistanın kənd təsərrüfatı naziri İbroxim Abduraxmonovun rəhbərlik etdiyi nümayəndə heyəti ilə görüşüb, kənd təsərrüfatı sahəsində ikitərəfli əməkdaşlığı müzakirə edib Nazir Məmmədov cari ilin mart ayında Daşkənddə “İtaliya-Mərkəzi Asiya-Azərbaycan” forumu çərçivəsində özbəkistanlı həmkarı ilə məhsuldar görüşü xatırladıb. O, Özbəkistanın Azərbaycan sisteminə əsaslanan öz kənd təsərrüfatı sığortası modelini həyata keçirdiyini qeyd edib və Azərbaycanın rəqəmsallaşma, süni intellekt, kənd təsərrüfatı sığortası və kənd təsərrüfatının inkişafının digər sahələrində təcrübəsini bölüşməyə hazır olduğunu bir daha təsdiqləyib Görüşdə Azərbaycanın Özbəkistana fındıq tinglərinin ixracının davam etdirilməsində və üzümçülük sahəsində əməkdaşlığın genişləndirilməsində maraqlı olduğu vurğulanıb. Müzakirələr zamanı, həmçinin kənd təsərrüfatında rəqəmsallaşma, innovativ texnologiyaların tətbiqi, davamlı sektor inkişafı və təcrübə mübadiləsinə diqqət yetirilib, aqrar-sənaye sektorunda əlaqələrin gücləndirilməsi üçün mühüm potensialın olduğu vurğulanıb Daha sonra Kənd Təsərrüfatı Sığortası Fondu ilə Özbəkistanın Kənd Təsərrüfatı Nazirliyi yanında Kənd Təsərrüfatı Sığortası Fondu arasında əməkdaşlıq sazişi imzalanıb. Sənədi Kənd Təsərrüfatı Sığortası Fondunun İdarə Heyətinin sədri Fuad Sadıqov və Özbəkistanın Kənd Təsərrüfatı Nazirliyi yanında Kənd Təsərrüfatı Sığortası Fondunun direktoru Muratcan Açilov imzalayıblar. Müqavilənin məqsədi kənd təsərrüfatı sığortası sahəsində Azərbaycanın təcrübəsinin Özbəkistanda tətbiqi, o cümlədən kənd təsərrüfatı sığortası sisteminin inkişafı, risklərin effektiv idarə edilməsi, sığorta mexanizmlərinin təkmilləşdirilməsi, innovativ sığorta məhsullarının tətbiqi, o cümlədən sektorun rəqəmsallaşdırılması yolu ilə qarşılıqlı faydalı əməkdaşlığın genişləndirilməsi və gücləndirilməsidir