Şahmar Mövsümov: Kənd təsərrüfatının davamlı inkişafı üçün zəruri baza formalaşdırılıb

Son on il ərzində aqrar sahədə mühüm institusional və struktur islahatlar həyata keçirilib, dövlət dəstəyi mexanizmləri genişləndirilib, müasir infrastruktur yaradılıb, aqroparklar formalaşdırılıb, su təsərrüfatı və meliorasiya sahəsində iri layihələr icra edilib. Artıq kənd təsərrüfatının davamlı inkişafı üçün zəruri baza formalaşdırılıb AZƏRTAC-ın bölgə müxbiri xəbər verir ki, bunu aqrar sahədə yeni Dövlət Proqramının tanıtımı ilə bağlı Ağcabədidə keçirilən regional müşavirədə Prezidentin köməkçisi - Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov deyib Şahmar Mövsümov bildirib ki, Prezident İlham Əliyevin sədrliyi ilə bu il mayın 25-də keçirilən kənd təsərrüfatı məsələlərinə həsr olunmuş geniş müşavirədə aqrar sahənin mövcud vəziyyəti ətraflı təhlil edilib, əldə olunmuş nəticələr qiymətləndirilib və qarşıda duran əsas vəzifələr müəyyən edilib. Elə həmin gün Prezident tərəfindən “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” təsdiq edilib. Bu proqram qarşıdakı beş il ərzində aqrar sektorun inkişaf istiqamətlərini müəyyən edən əsas strateji sənəddir “Prezidentin tapşırıqlarına uyğun olaraq ölkənin bütün iqtisadi rayonlarında Dövlət Proqramının məqsəd və vəzifələrinin izah edilməsi, yerlərdə mövcud vəziyyətin qiymətləndirilməsi və sahibkarların təkliflərinin dinlənilməsi məqsədilə müşavirələr keçirilir. Bugünkü görüş də həmin prosesin tərkib hissəsidir”, - deyə o əlavə edib 2026 © AZƏRTAC. Müəllif hüquqları qorunur. Məlumatdan istifadə edərkən hiperlinklə istinad olunmalıdır