Ҳар қандай қурилишда энг асосий мезон сифат, хавфсизлик ва жамоатчилик назорати бўлиб қолиши лозим

Мамлакатда шундай ўзгаришлар кечаётган бир паллада янги қурилган объектларни қулаб тушиши қурилиш ишларининг сифати, техник назорати, лойиҳа экспертизаси ҳамда қабул қилиш жараёнида белгиланган талабларга қай даражада риоя этилгани бир қатор жиддий саволларни келтириб чиқармоқда Қайд этиш жоизки, куни кеча Мирзо Улуғбек туманидаги “Буюк Турон” йўл ўтказгичининг бир қисми қулаб тушган. Ушбу иншоот қурилиши учун давлат бюджетидан 128,6 миллиард сўм маблағ сарфланган ва 2024 йил август ойида фойдаланишга топширилган.Маълумотларга кўра, иншоот қурилишида юз йилдан ортиқ хизмат қилиш кафолатига эга бўлган темир конструкциялардан фойдаланилган. Лекин фойдаланишга топширилганига икки йил бўлмай туриб, унинг бир қисми қулаб тушгани жамоатчиликнинг ҳақли эътирозларига сабаб бўлмоқда Бу борада, “Адолат” социал-демократик партияси мазкур ҳолат юзасидан қуйидаги ҳолатларга ойдинлик киритилиши лозим, деб ҳисоблайди: Биринчидан, иншоотни барпо этишда қурилиш меъёрлари, муҳандислик стандартлари ва хавфсизлик талабларига қай даражада риоя этилганлик ҳолати; Иккинчидан, объект бўйича давлат маблағларининг сарфланиши қанчалик асосли ва самарали бўлгани, бунда очиқлик ва адолат тамойиллари қай даражада таъминланганини ҳам аниқлаштириш керак; Учинчидан, йўл ўтказгич билан боғлиқ воқеанинг сабаблари атрофлича ўрганилиб, натижалари очиқ ва шаффоф тарзда жамоатчиликка етказилиши, айбдорлар қонун доирасида жавобгарликка тортилиши ва адолатни таъминланиши ҳамда келгусида бундай ҳолатларнинг олдини олиш бўйича аниқ чоралар кўрилиши муҳим аҳамият касб этади Бунёдкорлик ишлари юртимиз тараққиётининг муҳим кўрсаткичидир. Бироқ, ҳар қандай қурилиш лойиҳасида энг асосий мезон сифат, хавфсизлик ва жамоатчилик назорати бўлиб қолиши керак “Адолат” социал-демократик партияси